A Concellaría do Medio Ambiente da Pobra do Caramiñal, da cal é titular a edil Genoveva Hermo (Nós Pobra), informa de que os datos obtidos durante 2020 apuntan que cada pobrense reciclou 74’37 quilogramos de residuos no transcurso do pasado exercicio. Atendendo á recollida selectiva, os envases constitúen arredor de 21 quilogramos, seguidos do vidro (18’65 kg), papel-cartón (15’61 kg), o rexistrado no punto limpo (14 kg), téxtil (4’18 kg), aceite de cociña usado (0’73 kg) e o depositado nos minipuntos limpos urbanos (0’11 kg).
Doutra banda, no concello xeráronse durante o pasado ano case 4.000 toneladas da fracción do resto, o que é, segundo sinala a Concellería, “unha cifra considerábel que contrasta coas 196 toneladas de envases, 174 de vidro e 145 de papel-cartón”. Por iso, dende a Área do Medio Ambiente fan fincapé na utilización de composteiros, xa que contribúen a reducir o peso da fracción do resto, recollida nos contedores verdes, e que representa máis do 90% do lixo xerado. Cómpre lembrar que o Concello lle dá continuidade ao proxecto da compostaxe co repartimento doutros 50 novos composteiros domésticos, o cal foi anunciado no mes de febreiro.