O escritor, divulgador, xornalista, blogueiro e profesor da USC Manuel Gago Mariño (Palmeira 1976), afronta este mes de marzo cunha importante novidade literaria, que engadir aos seus recentes éxitos nas librarías (como o libro de aventuras O exército de fume ou O anxo negro, localizado este último na Costa da Morte e nunha hipotética investigación para recuperar unha figura roubada da Santa Mariña).
Gago volve agora con Nus (Xerais), un libro no que acompañamos as andainas do aristócrata galego Toño Figueroa, integrante, a finais dos setenta e comezos da década dos oitenta, do radical movemento nudista que encheu naquela época algúns dos máis senlleiros areais da nosa terra, como por exemplo o de Arealonga en Porto do Son. No caso de Figueroa e as súas amizades, recalan á solitaria praia de Calabarda, un paraíso aberto ao océano onde se pode ser libre dun xeito novo: sen roupa. Manuel Gago ofrécenos en Nus “un retrato irónico e irreverente da contraditoria Galicia de comezos da década de 1980 a través das aventuras sexuais dun crápula tan cínico como tenro”. A novela está dispoñíbel nas librarías dende o pasado 11 de marzo.
Fonte de inspiración: os movementos naturistas dos oitenta
Inspirada nos movementos de loita polo naturismo nas praias galegas a principios dos 80, Nus é unha aposta literaria diferente aos anteriores textos de Gago, tal e como el mesmo fai saber dende o seu blog (Capítulo Cero), se ben engade que os lectores serán quen “de recoñecer claves, escenarios e (seguro) personaxes”.
E explica: “En Nus exploro a sensualidade, o descubrir do sexo, a masculinidade… pero tamén escribo desde a memoria dun protagonista un tanto incómodo, que relata a Galicia entre a transición e a primeira democracia desde un punto de vista pouco habitual na literatura do país. É unha novela dunha persoa, pero tamén dun tempo”.
