Máis de 60 cativos de Lousame participaron nunha sesión formativa sobre a vespa velutina

O Concello de Lousame imparte estes días sesións formativas sobre os riscos das vespas velutinas e as medidas que se poden poñer en marcha, a nivel colectivo e individual, para pórlles freo nesta tempada primaveral. Este 24 de marzo celebrouse unha destas actividades de divulgación no CPI Cernadas de Castro, na que participaron 61 nenas e nenos. Explicóuselles a orixe do insecto, como foi a súa evolución e invasión no territorio galego e cales son as características que as distinguen das vespas autóctonas.

Durante esta xornada os catro grupos de Primaria fixeron trampas caseiras seguindo as indicacións e explicacións dos especialistas.

As sesións formativas continuarán mañá con 97 nenos e nenas deste mesmo centro educativo.

O Concello de Lousame puxo en marcha unha campaña contra as vespas velutinas a través da difusión e da sensibilización sobre a importancia de capturar as raíñas desta especie, “posto que os meses de marzo e maio son fundamentais para evitar que cando as vespas saían do seu letargo comecen a construír niños”, explicou o Goberno local.