O Concello de Ribeira informa da licitación dunha nova actuación dirixida á pavimentación dun camiño no lugar de Gándara, na parroquia ribeirense de Artes.
A intención do proxecto reside en dotar ao citado camiño dun novo aglomerado asfáltico (incluíndo os sobreanchos que están actualmente en terra), previo acondicionamento da superficie a pavimentar.
O prezo de licitación ascende a 34.413 euros, IVE incluído. A intervención enmárcase no Plan Provincial de Cooperación ás Obras e Servizos de Competencia Municipal (Plan Único de Concellos) POS+ 2020. O prazo de execución son dous meses.
As empresas dispoñen ata o 5 de abril á medianoite para presentar as súas ofertas a través do Sistema de Licitación Electrónica da Xunta de Galicia (SILEX).