Por unhas razóns e por outras, case todas relacionadas con incivismo e a suposta comodidade de cada quen, segue presente nos nosos concellos a práctica de botar lixo e todo tipo de desperdicios (algúns deles perigosos e contaminantes) onde mellor lle cadra a quen se desfai deles. En Noia o Concello informou os días pasados de novos e tristes caso de incivismo medioambiental, que motivaron a mobilización da Concellería de Medio Ambiente e dos operarios municipais para retirar puntos de vertidos incontrolados. Desta volta púxose o foco na contorna de Taramancos, onde houbo que apañar grandes cantidades de refugallos a carón dos contedores.
O Concello fixo un novo chamamento aos cidadáns que teiman nestas prácticas para que procuren depositar os residuos e enseres “de forma correcta”, ou “achegalos ao Punto Limpo no Polígono de Augalevada”. O Concello convidou tamén á veciñanza a que denuncie “os comportamentos incívicos de algúns/algunhas para axudar a identificar e sancionar aos/ás infractores/as”.
