O Concello de Lousame activará este luns 29 de marzo o programa Lousame Concilia Semana Santa, a nova iniciativa local de lecer vacacional para a rapazada. Farao baixo as máis estritas medidas seguridade e achegando nesta nova edición un total de 12 prazas (das que fican dispoñíbeis dúas para días soltos). A iniciativa vén da man do equipo de Igualdade do Concello. Desenvolverase os días 29, 30 e 31 de marzo e o 5 de abril.
O Concello engade que “no pasado mes de decembro as familias realizaron a inscrición neste programa que se desenvolve durante as vacacións de Nadal, Entroido e de Semana Santa, polo que un total de 10 rapaces e rapazas teñen xa a súa praza asignada”.
Agora, as familias interesadas en que os seus pequenos e pequenas asistan a este programa deben reservar a praza no día anterior a través do teléfono 616 345 812 en horario de 09.30 a 14.30 horas durante as xornadas do programa e de 07.45 a 09.00 horas antes do día 29 (primeiro día do Lousame Concilia Semana Santa).
En total haberá dúas persoas monitoras responsábeis das actividades lúdicas, deportivas e culturais que se proporán aos nenos e nenas que participen nesta iniciativa.
A concelleira de Igualdade, Silvia Agrafojo, sinalou que “este proxecto é mostra do compromiso do Executivo coas realidades das familias lousamiás. A nosa intención é facilitar a conciliación familiar e laboral da nosa veciñanza”.
O programa Lousame Concilia está subvencionado pola Secretaría Xeral de Igualdade e polos Fondos Sociais Europeos.
