O Concello de Boiro vai executar obras para a mellora da seguridade viaria e da accesibilidade no entorno dos centros públicos de ensino da avenida de Compostela. A actuación está agora en licitación, por un importe de 50.087,49 euros e vaise levar a cabo co financiamento da Deputación da Coruña, con cargo ao Plan Único Concellos POS 2020.
A obra que se pretende executar discorre polo casco urbano de Boiro e, segundo informa o Concello, “con ela preténdese dotar de seguridade a unha zona moi sensíbel da avenida de Compostela xa que, nuns 200 metros, se concentran os accesos a dous centros públicos de ensino de primaria e un centro de ensino público de secundaria e bacharelato”. Estes treitos concentran en horas puntuais importantes afluencias de escolares, vehículos particulares e transporte público, nos momentos de entrada e saída das aulas.
A actuación que se vai levar a cabo pretende xerar “un espazo de máxima seguridade viaria limitado a 30 km/h”. Será, engade o Goberno boirense, totalmente accesíbel e contará con percorridos seguros para entrar dende a rúa aos centros de ensino.
A obra contempla a reparación das beirarrúas actuais, que segundo lembra o Concello “teñen numerosas deficiencias e barreiras arquitectónicas”, por unhas de pavimento continuo e totalmente accesíbel que permitan un acceso cómodo e seguro aos centros.
Vanse executar tamén pasos de peóns elevados, cunha función dupla: por unha banda a de permitir un paso sen obstáculos para persoas con mobilidade reducida e, pola outra, servir de elementos redutores de velocidade na zona de acceso aos colexios.
“Para intensificar a seguridade viaria vaise reforzar a sinalización do chan e instalaranse redutores de velocidade”, explicou o Concello, engadindo que tamén se procederá á renovación das luminarias, eliminando as obsoletas e instalando unhas de menor altura e maior rendemento.
