O Concello de Noia quere saír ao paso da máis que probábel proliferación de niños de vespas velutinas no termo municipal, agora que xa estamos mergullados na tempada primaveral. Por esta razón e co obxectivo de combater a presenza desta especialmente prexudicial especie invasora, pon en marcha a cuarta Campaña contra a Vespa Velutina.
A iniciativa, que vén da man da Concellería de Medio Ambiente que dirixe Martín Fernández Godón, é unha proposta participativa que tenta mobilizar á veciñanza para traballar de xeito conxunto na localización e captura de vespas asiáticas, para o cal achegaranse trampas específicas. Medio Ambiente fai saber que as persoas interesadas en facerse cunha trampa deben dirixirse ao Consistorio, no segundo andar, e presentar unha solicitude. O prazo para presentar as solicitudes comeza este martes 23 e remata o 15 de xuño.
