Se ben a Semana Santa de 2021 está claro que non será como ningunha outra das anteriores á pandemia, a experiencia acumulada das autoridades e da cidadanía ao longo deste ano de restricións e medidas anti-COVID vai permitir certa marxe de acción. Unha acción limitada e responsábel, como a que propón o Concello e a cidadanía de Porto do Son, grazas tamén ao labor da Confraría da Paixón do Noso Señor.
Estes días puidemos coñecer o programa local de celebracións da Semana Santa: unha axenda elaborada para seguir de maneira exhaustiva todos os protocolos de prevención fronte á COVID e que ofrecerá aos fregueses a posibilidade de seguir as celebracións a distancia a través do sitio en Youtube do Concello de Porto Son, engadindo polo tanto un extra de seguridade. Tamén se poderá facer seguimento a través das redes sociais do Concello e da dita Confraría.
Este sería o programa previsto:
· A axenda comeza este 26 de marzo, Venres de Dolores, ás 20.00 horas, coa misa solemne á Virxe das Dolores en memoria dos cofrades falecidos.
· O 28 de marzo, Domingo de Ramos, celebrarase a bendición dos ramos e a misa solemne a partir das 12.00 horas.
· O 30 de marzo, Martes Santo, está prevista unha misa ás 20.00 horas, e máis o rezo do Viacrucis.
· As actividades proseguirán o 1 de abril, Xoves Santo, coa Misa da Cea do Señor, ás 18.00 horas.
· O 2 de abril, Venres Santo, celebrarase a Paixón do Señor a partir das 18.00 horas.
· O 3 de abril, Sábado Santo, desenvolverase a Vixilia Pascual a partir das 18.00 horas.
· O 4 de abril, Domingo de Pascua, oficiarase a misa solemne da Resurrección do Señor a partir das 12.00 horas.
