A Pobra celebrou o Día da Muller cunha caravana feminista, unha manifestación virtual e accións de sensibilización nos colexios

A Pobra do Caramiñal acolleu este luns (e os días previos) varias importantes actividades para conmemorar o Día Internacional da Muller. Unha das accións máis destacadas foi a caravana feminista que percorreu as rúas da vila, reivindicando a igualdade e os dereitos das mulleres ao tempo que se garantiu, ao cen por cen, a seguridade sanitaria.

O circuíto iniciouse ás 20.00 horas no paseo dos Areos para continuar pola rúa da Ponte, rúa Gasset, rúa da Paz, rúa Díaz de Rábago e rúa Anxo Rey Ballesteros. Concluíu no aparcadoiro do recheo, onde se levou a cabo a lectura do manifesto e diversos textos por parte de concelleiras da Corporación municipal.

As persoas asistentes permaneceron no interior dos seus vehículos co obxectivo de respectar as medidas establecidas por mor da COVID-19. Contouse coa colaboración da Policía local e das persoas voluntarias da Protección Civil.

Así mesmo, xa na semana pasada botou a andar unha manifestación virtual mediante a colocación nas xanelas ou balcóns da Pobra de pancartas e mandís, foi unha actividade participativa que incluíu a publicación dos adobíos nas fachadas nas redes sociais etiquetando a Concellería de Igualdade da Pobra e cinco amizades coa finalidade de espallar a mensaxe.

Ademais, unha das liñas principais de reivindicación desenvolveuse nos centros de ensino, con accións de divulgación, sensibilización e implicación que se levaron a cabo baixo o lema A igualdade comeza pola educación, a través do cal incidiuse na importancia de ensinar a igualdade dende idades temperás.

O Concello da Pobra lembrou que as accións focalizadas no ámbito educativo están a ser financiadas polo Pacto de Estado contra a Violencia de Xénero e polo Ministerio da Igualdade. Ademais, a Administración local adheriuse á campaña OitoM, Moito por cambiar, da Deputación da Coruña.