A plataforma Stop Deshaucios Barbanza emitiu este luns un comunicado no que manifesta a súa satisfacción pola intención do Concello de Ribeira de achegar un fin social ás vivendas baleiras que existen no termo municipal, contribuíndo a dar solución a un problema (o acceso a un fogar no que residir) que vén de lonxe e que coa chegada da pandemia e a crise económica non fixo máis que agravarse.
A plataforma congratúlase das conversas mantidas entre o alcalde Manuel Ruíz do director do Instituto Galego de Vivenda e Solo (IGVS) da Xunta, Heriberto García así como co responsábel da Sareb.
Como dixemos, o obxectivo destas comunicacións é comprobar a viabilidade de dar un uso solidario ás vivendas desocupadas que existen no termo municipal, en diferentes urbanizacións, “buscando a maneira de tentar a adquisición dalgunhas delas por medio do sistema do dereito ao tenteo ou o retracto das referidas propiedades”. A mesmo tempo, valórase tamén a posibilidade de negociar o formato da cesión temporal doutros inmóbeis ao obxecto de que poidan servir para atender os realoxos de familias vulnerábeis, en caso de despexos por falta de pagamentos da hipoteca ou as rendas do aluguer así como nas situacións de emerxencia habitacional.
