Os socialistas piden medidas urxentes para evitar o esmorecemento marisqueiro dos Lombos do Ulla

Os socialistas galegos pediron este xoves ao Goberno autonómico medidas para evitar que se siga a estragar a produción de marisco dos Lombos do Ulla, no treito baixo do río que separa as provincias da Coruña da de Pontevedra e desauga na ría de Arousa. A reclamación veu dada polo portavoz de Marisqueo do Grupo Socialista, Julio Torrado, que esixiu á Xunta que “non deixe morrer a explotación da ameixa e do berberecho nos Lombos do Ulla”, xa que, dixo, “as mariscadoras e mariscadores levan catro meses na casa sen poder traballar”. Fíxoo, hoxe, a través dunha pregunta ao goberno galego na Comisión de Pesca e Marisqueo do Parlamento.

Torrado criticou a “desatención” e a “falla de actuación” do Goberno galego na zona ante uns datos que sinalan que a produción destes moluscos “baixa ano tras ano”. Neste senso, sinalou que son “varios problemas” ante os que a Xunta mantén a súa “inacción”, comezando polas consecuencias xeradas polas pontes e estradas construídas sobre o río e o súa influencia no cambio das correntes, “o que provoca que a area non circule ben e se acumule”. Tamén lembrou que “antes había canles de varios metros de ancho que agora non existen”, xa que “a auga só circula por enriba”, o que “xera un problema grave” que “impide que os moluscos crezan e poidan ser aproveitados”.

Ante esta problemática pediu á Xunta que faga “un dragado real na zona” e que solucione os problemas de contaminación na contorna.

Doutra banda, sinalou que na contorna “existe un problema coa salinidade das augas”, un problema, dixo, “que a Consellería achaca ás choivas, pero en realidade hai un problema tabú sobre o encoro de Portodemouros, que non informa, como así o fan outros encoros, cando realiza os seus baleirados de auga” e, cando isto ocorre, os moluscos “morren” coa auga doce.