Os Grupos de Acción Local do Sector Pesqueiro (GALP) puxeron en marcha a segunda edición dun programa dirixido a a asegurar o relevo xeracional no noso sector pesqueiro, co fin de manter, nas vindeiras xeracións, a continuidade económica, social e histórica deste relevante piar produtivo.
Os grupos (Golfo Ártabro Norte, Golfo Ártabro Sur, A Mariña-Ortegal, Seo de Fisterra-Ría de Muros-Noia e Ría de Arousa) achegarán formación, capacitación e asesoramento (con titorías persoais, sesións participativas e abertas e visitas a empresas e entidades do sector do mar) a través de diversas actividades, todo dende unha óptica de sustentabilidade e de posta en valor das actividades económicas ligadas ao mar e ao marisqueo.
A nova edición do programa Relevo (que chega cun algo de atraso por mor das medidas restritivas para frear o avance da COVID-19) vén con mellor dos precedentes: o éxito de participación e implicación logrado pola primeira entrega. A previsión é que as actividades comecen este mes de marzo.
Os requirimentos para poder participar na segunda edición de Relevo son os seguintes: ser maior de 16 anos e estar empadroado nalgún dos concellos do territorio do GALP. As persoas interesadas poden consultar toda a información sobre o proxecto na páxina web relevo2020.org, escribindo un correo electrónico a info@relevo2020.org ou ben chamando ao teléfono 633 335 463.
O proxecto Relevo é en si mesmo un recordatorio á xuventude (mozas e mozos de entre 16 e 30 anos) para que se identifique co mantemento e desenvolvemento da actividade ligada ao mar, a través de formación, encontros, asesoramentos e actividades que contribúan ao mellor coñecemento dos recursos do noso litoral.
