O cribado realizado no Consistorio de Boiro arroxa cinco casos positivos

O Concello de Boiro vén de emitir un informe sobre a evolución da COVID no Consistorio, que, como anunciamos estes días, está a verse afectado por contaxios de coronavirus. Segundo fai saber, xa son cinco os casos positivos no brote de coronavirus detectado na Casa do Concello e que afecta a traballadores da Administración local. As probas PCR realizadas este martes entre os contactos directos deron o resultado de tres novos positivos, polo que son un total de cinco os infectados.

A maiores o Goberno boirense anunciou que se vai facer un cribado masivo a todo o persoal traballador do Consistorio para desbotar posíbeis novos contaxios ou casos asintomáticos.

Polo que se refire aos contactos directos das persoas con positivo o Concello fai saber que se atopan en corentena preventiva á espera de ser chamados para facer a proba.

Amais, os departamentos estarán traballando co cincuenta por cento da xente en presencial, sen atención ao público, e o outro cincuenta en teletraballo para evitar os contactos na medida do posíbel.

O Concello engade que todos os departamentos seguen a funcionar con normalidade “pero sen atención ao público”, con atención telefónica e telemática, a espera de que sexa chamados a facer as probas PCR e coñecer os resultados. A Casa Consistorial seguirá pechada, sen atención presencial ata novo aviso e as cuestións urxentes atenderanse de maneira telefónica ou telemática.