O Concello de Boiro celebrou este martes 23 unha nova sesión semanal da Comisión de Seguimento da Evolución da COVID-19. Segundo se confirmou trala xuntanza, o Goberno boirense retoma a súa actividade normal “tras non detectarse novos casos positivos entre o persoal que estaba en corentena e recibir a alta todas as persoas con positivo detectadas no gromo de coronavirus”.
O Concello engadiu que até o día de hoxe a actividade do Consistorio estaba ao 50% (coa metade das traballadoras e traballadores desenvolvendo o seu labor presencialmente e a outra metade teletraballando para reducir os contactos), pero que a evolución positiva da incidencia permite volver a unha situación de relativa normalidade. Con todo, o Executivo boirense puxo o foco na necesidade de seguirmos empregando cita previa e de dar prioridade aos trámites telefónicos e telemáticos sempre que sexa posíbel.
Polo que respecta aos centros municipais, comezarán a retomar tamén a súa actividade de xeito paulatino.
As bibliotecas municipais volven abrir para préstamo e devolución de libros e as salas de estudo permiten a estadía en sala cunha capacidade máxima do 30%, respectando a distancia de seguridade e co uso obrigatorio de máscara e vaise restablecer tamén a programación cultural.
Coincidindo coa entrada en vigor das novas medidas da Consellaría de Sanidade, vaise permitir o uso de pistas deportivas ao aire libre e parques infantís, “cumprindo sempre as medidas de seguridade vixentes decretadas polas autoridades”, informou o Concello, engadindo que as instalacións deportivas municipais “estarán dispoñíbeis para a práctica de deporte federado, previa solicitude ao departamento de Deportes, e seguindo sempre os protocolos que indique a federación correspondente.”
O Goberno boirense fixo saber que tamén que este martes retómase o mercado semanal que se celebra os martes na avenida da Constitución, que estaba temporalmente cancelado, cun 50% dos postos. “Os axentes da Policía Local coidan que se cumpran as restricións e medidas de seguridade como son o uso obrigatorio de máscara e que se eviten as aglomeracións de persoas”, informaron dende o Consistorio.
Balance de dispositivos e sancións
Os axentes da Policía Local seguen velando polo cumprimento das restricións e medidas de seguridade. Na última semana interpuxeron 23 denuncias. 6 polo uso indebido de máscara; 1 por fumar sen manter a distancia de seguridade; 3 por non respectar o peche perimetral; 3 por incumprir o toque de queda; 8 por xuntanzas de persoas non convivintes e 2 por beber na rúa e non respectar a distancia de seguridade.
O Concello de Boiro agradece a cidadanía “o cumprimento das medidas e restricións que fixeron durante este tempo para baixar o nivel de incidencia no municipio”. Tamén fai un chamamento tamén á responsabilidade individual e lembra “a importancia do cumprimento de todas as medidas de seguridade e hixiene decretadas polas autoridades sanitarias para que o número de casos activos e contaxios siga en descenso”.
