O Concello de Boiro vén de instalar unha columna con equipamento para que, de xeito gratuíto, a cidadanía poida facer pequenas reparacións en bicicletas. Unha destas columnas está xa habilitada no exterior da Casa das Colonias de Praia Xardín, a carón do carril bici, precisamente. Con esta medida, o Concello quere facilitar ao máximo os medios de transporte saudábeis e limpos, tanto como recurso de mobilidade como para a práctica deportiva e do lecer. Segundo confirma o Goberno local, detectouse, de feito, un incremento notábel das persoas que usan bicicleta e que, ademais, demandan infraestruturas e servizos relacionadas.
En concreto, o obxectivo do Concello de Boiro é “potenciar o uso tanto de bicicletas como de vehículos de mobilidade persoal”, polo que está traballando na instalación de aparcabicis, que se colocaron xa en diversos puntos do municipio, e por aumentar os quilómetros de carrís bici no termo municipal.
A columna para arranxos e mantemento acabada de instalar está equipada con ferramentas para poñer as bicicletas a punto, “xa que moitas persoas non dispoñen nas súas casas do equipamento e dos espazos axeitados para facelo”.
En breve o Concello adquirirá máis destes elementos para habilitados noutros recantos do municipio.
