O alcalde de Rianxo Adolfo Muiños, preside Barbanza-Arousa no ano 2021

Esta mañá celebrouse o Pleno da Mancomunidade de Municipios Barbanza
Arousa no Auditorio de Rianxo, co cambio de presidencia e traspaso de poderes, como primeiro punto da Orde do Día. Este cambio prodúcese de forma anual e, para o ano 2021 é a quenda de Adolfo Muiños, alcalde de Rianxo, que recolle a testemuña de Manuel Ruiz, alcalde de Ribeira.

Durante a sesión plenaria, ambos os alcaldes destacan a boa sintonía e colaboración que existe entre os catro concellos da Mancomunidade para levar a cabo a estratexia do destino turístico. Esta estratexia seguirá a liña que xa viña traballando, baseada na Ría de Arousa e a Serra do Barbanza como eixos diferenciadores e co Camiño de Santiago por terra e por mar, o turismo náutico e o turismo de natureza como produtos principais. Neste sentido, en vista do Xacobeo 21-22, déronse pasos moi importantes no Camiño de Santiago “A Orixe” coa definición e trackeado do percorrido, a delimitación do mesmo, a panelización e a creación de materiais promocionais. Para este ano abórdase a sinalización e a difusión entre os mercados potenciais. Os roteiros de sendeirismo, que tamén se están poñendo en valor, permitirán ao visitante coñecer a Serra do Barbanza e tamén o mar, porque todas elas ofrecen panorámicas á Ría de Arousa.
Esa fusión, serra e mar, constitúe os cimentos do turismo de Barbanza Arousa, sempre desde o punto de vista da sustentabilidade.

Continuarase, así mesmo, potenciando a colaboración público-privada e o traballo co sector a través da Comisión de Turismo e Comercio e a plataforma de venda cruzada, unha plataforma que integra as experiencias e tamén aloxamento e restauración do territorio e permite a reserva directa e potencia as sinerxías entre o empresariado.