No Son anúncianse axudas para o sector marisqueiro

A conselleira do Mar, Rosa Quintana, reuniuse esta semana cos representantes de Portosín e de Porto do Son para coñecer as necesidades e inquedanzas do sector marítimo-pesqueiro da zona. Así, anunciou que a Xunta apoiará ao sector marisqueiro na recuperación das súas zonas de produción antes os efectos causados polos últimos temporais.

Os técnicos da Consellería do Mar levan dende o primeiro momento analizando as zonas nas que se rexistrou baixa salinidade nas augas e desprazamento de marisco cara ás praias a causa do mal tempo. Os profesionais deben agardar a ter unha avaliación completa do estado dos bancos para adoptar calquera medida adicional.

A Xunta pon ao servizo do sector diversas axudas, pero se estas non foran suficientes, buscarán vías de apoio alternativas, como a produción de semente para recuperar os bancos marisqueiros, un proxecto no que que se busca involucrar ao Clúster de Acuicultura de Galicia e ás federacións de confrarías co obxectivo de incrementar a produción dos bancos marisqueiros.

Deste xeito, o que buscan xuntos a Administración galega e o sector é superar as dificultades derivadas da pandemia e volver o antes posíbel aos niveis de actividade previos a esta crise, e lograr así facer o sector atractivo para a xente nova e acadar a remuda xeracional.

Ademais da reunión, a conselleira, Rosa Quintana, e a directora xeral de Desenvolvemento Pesqueiro, Susana Rodríguez, a presidente de Portos, Susana Lenguas, aproveitaron para visitar e comprobar o avance das obras de remodelación da fachada marítima de Porto do Son. A finalidade desta renovación é a de humanizar o bordo portuario e abrir o municipio ao mar, de xeito que se creen amplas zonas para o aproveitamento e desfrute dos veciños na franxa litoral.