A Consellería de Medio Ambiente manterá por terceiro ano consecutivo a bonificación dun 10% no canon que pagan a SOGAMA os Concellos adheridos. A Xunta ofrece esta posibilidade aos entes locais que cumpran dous requisitos: promover a redución de residuos e/ou a reciclaxe de envases lixeiros, e trasladar a rebaixa do canon aos recibos dos cidadáns.
A iniciativa pretende seguir incentivando os obxectivos fixados pola UE, a prevención e redución de refugallos en orixe, así como a achega dos municipios á reciclaxe e posterior depósito dos mesmo, por parte dos cidadáns, nos diferentes contedores habilitados na vía pública. O importe do canon non bonificado redúcese dos 69,83 euros/tonelada que se aplicou durante o ano pasado, aos 69,48 euros/toneladas fixados para 2021. Pola súa parte, as entidades locais que se acollan á medida aforrarán case sete euros por tonelada.
Na actualidade son 295 os Concellos adheridos ao modelo SOGAMA, o que supón o 94% dos de toda Galicia. Así, co obxectivo de fomentar a recuperación da materia orgánica e poñela en valora a través da compostaxe, a empresa pública medio ambiental lidera un programa de compostaxe doméstica ao que están adscritas un total de 358 entidades. Deste xeito, a compañía repartiu de forma gratuíta preto de 15.000 composteiro, co fin de evitar que os usuarios depositen os restos orgánicos no contedor verde convencional.
Ademais, SOGAMA planea a construción de tres novas plantas de biorresiduos en Pontevedra, Lugo e Ourense, que completarán a nave que opera xa en Cerceda, así como outras infraestruturas, co fin de que Galicia cumpra cos obxectivos europeos en materia de reciclaxe e valorización da fracción orgánica.
