A nave de redes de Portosín comezarase a renovar nos próximos meses. Así o acordaron nunha reunión os representantes da confraría, os membros da administración local e a xerente de GALP, Manuela Oviedo.
Este proxecto xa estaba pensado para anos atrás. Porén, non saíu adiante pola falta de presuposto. Esta vez, o investimento de 200.000 euros será asumida case na súa totalidade pola empresa GALP, xa que se encargará do 90% dos gastos. O presuposto restante será sufragado polo Concello da localidade, a confraría e o colectivo de redeiras e redeiros.
O alcalde de Porto do Son, Luis Oujo Pouso, remarcou que “o que se pretende non é a típica nave de bloques e tellado de uralita, polo que lle darán un cambio de imaxe”. Ademais, sinalou que “o obxectivo principal que se persegue con este plan é mellorar as condicións de traballo das redeiras”.
De feito, o proxecto inclúe a reorganización do espazo e a mellora da eficiencia enerxética e das condicións térmicas, a parte dunha intervención na cuberta e na fachada, co fin de evitar filtracións de auga. Doutra banda, cabe resaltar que se aumentará a área para instalar unha oficina turística.
