A orquestra emitirá a partir das 20.30 por streaming as Sinfonías núm. 3 e 4 de Beethoven, gravadas o verán pasado.
Debido ás actuais restricións sanitarias, a Real Filharmonía de Galicia decidiu cancelar todos os seus concertos -tanto no Auditorio de Galicia como por streaming- e toda a actividade que tiña prevista durante polo menos tres semanas, á espera de que a situación mellore. Pero, a fin de non perder o contacto co seu público, a RFG ofrecerá cada xoves, a partir das 20:30 horas, unha selección dos seus concertos anteriores e gravacións que a orquestra ten no seu arquivo.
Este xoves, 11 de febreiro, a Real Filharmonía de Galicia emitirá por streaming a Sinfonía núm. 3 e a Sinfonía núm. 4 de Beethoven. Ambas as obras foron gravadas o pasado mes de xullo no Auditorio de Galicia, baixo a batuta do director titular e artístico da agrupación, o mestre Paul Daniel.
Este concerto poderá seguirse a través das redes sociais da orquestra, en particular do seu Facebook e da súa canle de Youtube, e tamén a través da plataforma Tolemias.
