En decembro de 2019, o Concello de Boiro instalou contedores de aceite usado en distintas zonas do municipio e dende entón conseguiuse recoller 5.950 quilos de aceite vexetal doméstico, que serve como biocombustíbel para motores diésel e abono ou para a elaboración de ceras, vernices, cremas e deterxentes.
Segundo o departamento de medio ambiente do Concello de Boiro, “traballase para fomentar a reciclaxe de residuos e outros materiais, xa que o aceite doméstico usado pode causar danos importantes ao medio ambiente se non se recicla de xeito adecuado, como atascar tubaxes e saneamentos ou contaminar os rios e mares”.
Na localidade hai colocados arredor de 30 puntos de recollida de aceites, tanto nos núcleos urbanos como no rural, co fin de fomentar a reciclaxe de aceite. Os veciños deben reciclar de maneira correcta, depositando o aceite nos contedores en botellas de plástico. Así, os frascos recóllense e trasládanse a centros de transferencia para separar os impropios. Tamén se destilan para eliminar a auga, os sedimentos e os metais pesados.
