Este 12 de marzo a plataforma ButacaZero estreará a traxicomedia 32m2, unha peza de teatro absurdo sobre o confinamento do pasado ano. A obra da escritora e actriz rianxeira Esther F. Carrodeguas e Xavier Castiñeira propón unha viaxe cara un pasado recente, co obxectivo de “provocar unha catarse colectiva ante un acontecemento que marcou, e marcará, a vida da sociedade”. O espectáculo pasará por Noia e Boiro, entre outras localidades.
Na obra aparecen Laura Villaverde e Xurxo Cortázar como protagonistas. De feito, o argumento da peza xira en torno a unha parella que reside nun pequeno piso dunha superficie de 32 metros cadrados. Así, por medio de elementos cómicos e tráxicos, 32m2 visualiza a habitual convivencia coa precariedade e as desigualdades nun momento clave para todos.
Os directores da obra, Esther Carrodeguas e Xavier Castiñeira, sinalan que “a peza é un enredo co que todo o público se poderá sentir identificado, pois todos mercamos un chisco máis de papel hixiénico do habitual e todas tivemos que acabar por levantar as nosas propias alfombras para descubrir a merda que tiñamos debaixo dos propios pés”.
32m2 é unha peza que pretende curar feridas, despedirse das persoas que marcharon e homenaxear a aquelas que deron o mellor de si para frear a pandemia. Así, Xavier apunta que “para afrontalo temos que pechar etapas. E, sen lugar a dúbida, as mellores chaves son a risa e o pranto”.
Esta produción conta ademais cunha banda sonora ad-hoc creada polo músico folclórico Rodrigo Cuevas. É por iso que ButacaZero aséntase como referente do teatro contemporáneo no panorama escénico galego, xa que posúe unha gran capacidade á hora de dialogar co mundo actual.
Así, a obra presentarase entre os días 12 de marzo e 20 de xuño de 2021, coincidindo coa celebración do primeiro aniversario do confinamento por mor da COVID-19 na pasada primavera. A realización da peza terá lugar no Auditorio Municipal do Concello de Vigo e a xira continuará no mes de marzo polos teatros de Rianxo, Vilalba, Muros, Cee e Pontevedra. No mes de abril, 32m2 visitará as localidades de Noia, Melide, Boiro, Vilagarcía de Arousa ou As Pontes de García Rodríguez, entre outras. A continuación presentarase en Santiago de Compostela, A Coruña e Ourense, mentres que Ferrol, Cedeira ou Tomiño terán que esperar ata o mes de xuño para vela.
As persoas interesadas poderán ampliar a información na web da plataforma ou a través das redes sociais.
