O evento cultural e literario que tiña previsto para este venres 29 en Rianxo a Asociación Barbantia non puido ser, finalmente, como estaba perfilado. O motivo: a necesidade de garantir ao máximo a seguridade sanitaria das e dos integrantes do colectivo e de todas as persoas que tiñan previsto acudir, coas debidas medidas de protección, á presentación de Aproximacións a Manoel Antonio de Xosé Luís Axeitos, actividade enmarcada no eixo dos Actos Castelao 2021. Tamén estaba previsto dar a coñecer o suplemento 161 de A Voz de Barbantia, da man de Xosé Luis Veiras, autor plástico do proxecto. As dúas citas fixadas para este venres no Auditorio de Rianxo foron adiadas para cando a situación sanitaria mellore. Porén, si que se levou a cabo a asemblea xeral de Barbantia, de xeito telemático.
Ao seu abeiro, aprobouse e deuse impulso á programación cultural deste ano argallada polo colectivo comarcal, unha programación que de xeito inevitábel vén marcada pola COVID-19 e pola necesidade de dar unha viraxe dixital a boa parte da actividade normal da asociación (apuntalándose a posibilidade de levar a cabo as presentacións literarias previstas a través de streaming en Internet) e por desbotar a vertente da axenda que non sexa posíbel realizar con normalidade nin sequera a través das redes.
Entre as actividades que nun principio está programado manter tópanse a Semana Cultural Francisco Lorenzo Mariño, o Encontro de Poesía e Música no Barbanza e presentacións de libros como Vida e traballo no mar dos galegos, de Francisco Calo Lourido; Celada, de Antonio Piñeiro; Donos de seu. Loitas, arelas e froitos da xente do mar de Porto do Son (1580-1830), de José Manuel Vázquez Lijó; ou Unha tirada de dados, de Manuel Cartea.
