Persoal das escolas infantís, centros de maiores e oficinas da Xunta que son xestionados polo Consorcio Galego de Servizos de Igualdade de Benestar está a preparar mobilizacións para reivindicar a importancia social, formativa, dinamizadora e sanitaria do traballo que desenvolven e a prol de garantir a súa continuidade. A estas mobilizacións súmanse entre outras as traballadoras do Centro de Día e a Escola Infantil de Boiro (Galiña Azul), que anunciaron o inicio dunha folga indefinida que comezará este xoves día 18 durante toda a xornada, e ampliarase durante os xoves seguintes con paróns de 8,00 a 11,00 da mañá. A orixe da nosa protesta está, aclaran, en que “a Xunta pretende desmantelar o noso equipo profesional”. Faríao, sosteñen, no peor momento posíbel: no medio dunha pandemia “na que todas e todos estamos en primeira liña”.
As traballadoras de Boiro lembran que accederon aos seus postos de traballos polos sistemas selectivos legais que as administracións estableceron, con contratos temporais feitos ex profeso para desempeñar postos de traballo nos que levan desenvolvendo o seu labor profesional dende hai máis dunha ducia de anos. Ao longo dese tempo, explican, “a Xunta comete abuso reiterado con nós nos nosos contratos laborais, e agora, en vez de facer o posíbel para que os nosos contratos sexan fixos, pretenden botarnos a rúa”.
Tamén recordan que as directivas europeas prohiben o uso abusivo da contratación temporal “a que nos vimos sometidas todos estes anos”. E engaden: “Na defensa dos nosos postos de traballo, obríganos a colapsar os xulgados (numerosas sentenzas xudiciais nacionais recoñecen o abuso ao que levamos condenadas dende fai máis dunha década) e a facer mobilizacións para poder seguir traballando”.
