A Comunidade de Usuarios do Manancial Outeiro da Xema (Araño, Rianxo) vén de emitir un comunicado no que reflicten a súa preocupación por vindeiros traballos a realizar na súa parroquia en materia de captación de auga. En concreto, poñen o foco nun proxecto que foi paralizado no seu día “por carecer da licenza necesaria” e que agora, sinala a comunidade, preténdese executar no entorno doutras captacións existentes das “que veciños de diferentes núcleos da parroquia levamos anos abastecéndonos”.
O colectivo veciñal, unha vez que tivo coñecemento do proxecto, solicitou a Augas de Galicia a realización du estudo “sobre a posíbel afección que a realización do mesmo puidera ter nos mananciais de Traba (O Araño) e que, en función dos resultados do mesmo, reconsiderara, de ser o caso, a autorización da captación proxectada”.
A comunidade engade que “foron moitos os escritos que nas últimas semanas presentamos perante Augas de Galicia con esa finalidade, mais a día de hoxe non obtivemos resposta; intentámolo tamén a través do Valedor do Pobo, mais Augas de Galicia tampouco atende aos requirimentos que se lle fan dende esta institución”.
Segundo fan saber, os veciños de Traba, usuarios dende hai décadas do Manancial do Outeiro da Xema, “sentímonos abandonados e estamos moi preocupados pois vemos, que corremos o perigo de quedar sen a auga do manancial do que os nosos avós xa beberon”.