A atleta ribeirense Ana Peleteiro, a vicepresidenta Nadia Calviño, a ministra Yolanda Díaz ou a futbolista Verónica Boquete son algunhas das galegas que foron incluídas na preselección para optar a ingresar na lista das 100 mulleres máis influentes de España. Un total de 24 galegas foron seleccionadas entre as 1.000 candidatas que aspiran a un posto nun ranking orientado a “outorgar visibilidade” ás mulleres, segundo sinala Executivas de Galicia nun comunicado.
A iniciativa expón dez categorías que abarcan “todas as áreas que configuran o tecido empresarial, social, económico e cultural de España”. Así as cousas, nas votacións, abertas ata o 16 de marzo, hai galegas candidatas en todas as categorías salvo no terceiro sector. Deste xeito, África González, Ana García Cabado, Marisol Soengas, Ana Freire, Mabel Louza e Manuela Camiño López optan á categoría de Académicas e Investigadoras; Luisa Lorenzo, Adriana Domínguez e Carmen Lence Ferreiro, á de Empresarias; e Ana Peleteiro e Verónica Boquete no apartado de Cultura, Lecer e Deporte.
En Directivas foron preseleccionadas Tesa Díaz- Faes, Marta Fernández Currás e Natalia Seoane; Nadia Calviño, Irene Souto Blázquez, Susana López Abella, Yolanda Díaz e Carla Reyes Uschinsky en Función Pública, institucional e política; e Ana Pardo de Beira na categoría de Medios de Comunicación. Así mesmo, tamén optan a un posto na lista Paula Carrera (Alta dirección) e Diana Lameiro, Mónica Seara e Susana Quintas, todas elas no apartado de Startups e pemes.
