Ribeira converterase no primeiro municipio galego que dote á súa hostalería dunha patrulla policial para velar polo cumprimento das normas anticovid. A iniciativa nace do acordo entre a Asociación de Empresarios de Ribeira e o Concello, que tras recibir a proposta viu con bos ollos a posibilidade de garantir a seguridade dos locais da zona.
Coa hostalería pechada, agora é cando ambas entidades tratan de preparar e crear un procedemento de actuación por parte dos axentes. Nun principio, 2 axentes de policía local, Patrulla COVID-19, serían os encargados de realizar unha vixilancia especial e única para velar polo cumprimento da normativa sanitaria vixente. Así, os axentes patrullarán polos locais de hostalería e terán permiso se fose necesario para acceder ao interior, co fin de dotar dunha maior seguridade aos bares.
A proposta da Asociación de Empresarios de Ribeira, presidida por Francisco Martínez Gude, é froito do temor de todos os profesionais do sector, xa que explican que un novo cerre sería insostible para todos e desta forma evitaríase que os clientes poidan incumprir as normas sanitarias e así reforzar o traballo dos camareiros e donos dos locais, ademais de mellorar a seguridade da hostalería.
Dende a sede da Asociación de Empresarios de Ribeira tamén solicitan o peche perimetral do municipio nos vindeiros festivos, pontes e Semana Santa. A actividade podería poñerse en marcha o vindeiro día 18 de febreiro coa posible apertura do sector hostaleiro.
