Este venres a sección sexta da Audiencia Provincial de Santiago procesará a un veciño da comarca ao que se acusa de ser o presunto autor dun delito continuado de roubo, polo que o fiscal solicita unha pena de seis anos de prisión.
Os feitos polos que terá que prestar declaración ocorreron en outubro do 2018 cando, supostamente, entrou en cinco inmobles e as súas dependencias anexas. Todas as vivendas están situadas en Ribeira e, ademais de causar importantes danos, levou material de todo tipo, ademais de artigos de alimentación e bebidas.
Nunha das casas parece utilizou unha pedra para romper o cristal dunha xanela e poder acceder ao interior, e unha vez dentro prendeu lume a un sofá, o que provocou que toda a estancia se enchese de fume. Tamén rachou a porta de acceso a un baixo e a dous alpendres, polo que os danos causados ascenden a preto de 4.000 euros.
Nun galpón anexo a outro dos inmobles nos que actuou este presunto delincuente subtraeu unha bicicleta valorada en preto de 220 euros e un kaiak, que finalmente puido ser recuperado polas forzas da orde. Con todo, o botín puido ser moito maior, se non fose porque o propietario da vivenda acendeu unha luz cando escoitou que rompían o cristal dunha porta. O delincuente decidiu emprender a fuxida antes de ser descuberto.
Ademais da condena de prisión, o Ministerio Fiscal tamén solicita que o acusado se faga cargo de abonar as correspondentes indemnizacións aos prexudicados ou, no seu caso, ás compañías aseguradoras que correron cos gastos de reparación. En total, calcula que o material roubado e os danos causados nos distintos inmobles elévanse a case 5.200 euros.
