O Concello de Ribeira vén de facer balance dos locais que se adheriron á campaña Lévame contigo #cociñaderibeira, unha iniciativa lanzada polo Goberno local consistente na posta a disposición do sector de recipientes de cociña (50 por negocio) co fin de facilitar o servizo de take away e axudar deste xeito a minimizar o impacto da pandemia. Segundo informou o Concello, a día de hoxe xa son quince os establecementos hostaleiros e gastronómicos de diversas parroquias do municipio que dispoñen dos envases de cociña para levar que forman parte da dita iniciativa.
O Goberno ribeirense engade que aínda quedan existencias a disposición de máis locais hostaleiros. Os interesados pódenas recoller na sede da Asociación de Empresarios de Ribeira (rúa Rosalía de Castro, 13) de luns a venres en horario de 9 a 14 e de 16.30 a 19.30 horas.
