A iniciativa pretende que os veciños se animen a utilizar este servizo e os hostaleiros, a ofrecelo. A presentación correu a cargo da tenente de alcalde Mariola Sampedro, quen definiu a campaña como un xeito de apoio incondicional ao sector.
O concello ribeirense encargou unha primeira remesa de dous mil recipientes, con capacidade para uns 750 mililitros, que se distribuirán gratuitamente entre os negocios de hostalería que o soliciten. Neles poderán meter as racións para consumir en casa.
A distribución estará centralizada na sede da Asociación de Empresarios de Ribeira, á que deben dirixirse quen desexe contar con estes recipientes.
O presidente da entidade, Francisco Martínez, subliñou que a distribución se fará tanto entre negocios que estean asociados como naqueles que non formen parte da entidade.
