Malia que as restricións sanitarias decretadas pola Xunta obrigaron ao Concello de Lousame a mudar a súa programación cultural neste comezo do ano, incluíndo a cancelación do tren turístico para a rapazada ou a tradicional Cabalgata de Reis, o Goberno local quixo manter acesa a chama da ilusión cunha actividade cen por cen controlada e segura na Casa da Cultura, este martes 5 de xaneiro: unha xuntanza coas Súas Maxestades en horario de 10:00 a 14:00 horas e de 16:00 a 20:00 horas.
Para evitar aglomeracións, o Concello de Lousame estableceu un sistema de reserva da entrada gratuíta para a recepción, ben a través de Bandoticket ben a través do teléfono da Casa da Cultura. Deste xeito, cada veciño e veciña que quixese asistir puido reservar a hora que máis lle conviña.
As visitas realizáronse en grupos moi reducidos, de acordo ao aforo limitado que xa dispón o auditorio da Casa da Cultura e con paradas para a desinfección do lugar. Así mesmo, as persoas que están a asistir, tanto rapazada como persoas adultas, usaron máscara, mantiveron a distancia de seguridade e desinfectaron mans e calzado na entrada, onde se lles tomou a temperatura.
A concelleira de Cultura, Silvia Agrafojo, sinalou que “dende o Concello de Lousame esforzámonos por manter viva a ilusión destas datas e por apostar pola organización da cultura nunha contorna segura. Por iso, malia que este ano tivemos que renunciar a tradicional cabalgata dos Reis Magos, si que puidemos deseñar un formato de recepción para nenos e nenas con estritas medidas de seguridade”.
