Os empresarios de Ribeira fan un chamamento a participar na concentración a prol da hostalería

A Asociación de Empresarios de Ribeira emitiu un comunicado este venres 15 no que mostra a súa adhesión ás concentracións da hostalería previstas nesta tarde na localidade e convida á cidadanía a participar na mobilización na praza do Concello “para pedir unhas medidas que axuden a suavizar a difícil situación do sector”, sen dúbida un dos máis duramente castigados pola crise sanitaria e económica e polas restricións sociais que se están a poñer en práctica dende as administracións.

Segundo lembra a entidade, asistirán á concentración, mostrando o seu apoio, a presidenta da Asociación de Amas de Casa de Ribeira, o presidente da Federación Galega de Confrarías de Pescadores e o patrón maior de Aguiño. A asociación tamén fai saber que o comercio local sumarase á mobilización mediante o peche dos establecementos entre as 18.30 horas e as 19.00 horas. Asemade, prega que sexan respectadas co máximo rigor as medidas anti-COVID.