O Concello de Rianxo comeza o ano de Castelao cun amplo programa de celebracións

O Concello de Rianxo comezou 2021 organizando unha manchea de actividades arredor do programa Actos Castelao 2021, destinado a conmemorar ao ilustre rianxeiro no setenta cabodano do seu falecemento. A proposta inclúe diversas actividades culturais, que xa comezaron no mes de decembro e que rematarán en febreiro.

Neste momento, está levándose a cabo o Certame Díaz Pardo, unha iniciativa da Deputación da Coruña, que consiste en promover o uso das artes plásticas. Esta actividade estará vixente ata o 18 de xaneiro.

Do mesmo xeito, celebrarase outra exposición o día 23 no Museo de Artes (Ribeira), que terá que ver cos gravados, en homenaxe a Luís Seoane e á Torre de Hércules. Ese día tamén está previsto un concerto na Coruña do grupo Ailá, para presentar o seu traballo ELO.

O venres 29 celebrarase a presentación de Aproximacións a Manoel Antonio de Xosé Luis Axeitos, coa participación de María Xesús Blanco, vicepresidenta da A. C. Barbantia, Roberto Abuín, de Axóuxere Editora e Adolfo Muíños, alcalde de Rianxo, ademais do autor. Amais, darase a coñecer o suplemento nº 161 de A Voz de de Barbantia e levarase a cabo unha intervención plástica a cargo de Xosé Luis Veiras Manteiga. O acto abrirase e pecharase coa actuación de Miriam Pardal Figueiro (trompa) e Félix Iago Rodríguez Ramos (bombardino), da Escola de Música de Rianxo.

Doutra banda, o sábado 30, celebrarase en Ribeira unha ofrenda floral coa intervención de autoridades e alumnado do IES Félix Muriel. A maiores tocará na Coruña o grupo 2naFronteira, presentando o traballo Arredor de Nós.

Por último, o venres 5 de febreiro, presentarase a novela de investigación Un señor elegante de Suso de Toro, coa participación de Xosé Luis Axeitos e Adolfo Muíños. Mentres, o sábado 6 farase a presentación de Castelao, a cargo do académico da RAG e profesor Francisco Fernández Rei e coa participación de Francisco Castro, director de Galaxia, e Adolfo Muíños.

Todas as persoas que queiran acudir a algún destes actos, deberán reservar a súa entrada en auditorio@concelloderianxo.gal, indicando o seu nome completo e teléfono. Tamén é preciso comunicar, de ser o caso, quen son convivintes (como medida preventiva fronte á COVID – 19). Para calquera outra información, os interesados poderán visitar as actividades na páxina web do Concello.