O Concello de Porto do Son informou do inicio das obras para o acondicionamento da rúa Costa da Granxa, na propia vila sonense, uns traballos que veñen cun investimento de 30.900 euros. Trátase, en palabras do Goberno local, “dunha obra moi agardada”, que forma parte dunha estratexia local de mellora das infraestruturas que “busca reactivar a economía local a través da creación de emprego e do consumo”.
Amais disto, o Concello tamén comunicou o remate das tarefas de posta a punto da rúa Salvador, que xa foi aberta ao tráfico e que durante este outono-inverno foi obxecto de traballos de acondicionamento que implicaron un investimento de 60.000 euros. Nesta rúa procedeuse a substituír as tubaxes de augas residuais e pluviais e a renovar o pavimento, reemprazando o aglomerando asfáltico por formigón pulido.
Estes días tamén está previsto o inicio de máis traballos de posta a punto nunha rúa próxima ás devanditas: a rúa Petón. Todos estes vieiros comparten, segundo confirmou o Concello, eivas semellantes que cómpre solucionar. A maiores, nesta mesma contorna, acondicionaranse as rúas Santa Irene e Atalaia.
