A artista suízo-galega Nastasia Zürcher vén de lanzar un novo tema de seu nas redes (o segundo adianto do seu novo disco) que foi gravado na nosa terra polo filmmaker Jairo Moreno, concretamente no Auditorio de Rianxo. O novo tema chámase Revelation e é unha canción para plantar cara ás adversidades actuais coa súa alegre e agradecida mestura de disco, funk, pop e folk. Dende que foi subida ao Youtube, a mediados de xaneiro, xa recibiu mancheas de reproducións (1.800 este 26 de xaneiro) e comentarios positivos.
Nastasia Zürcher, Premio Martín Códax da Música na categoría de Blues, Funk & Soul, atópase na actualidade na precampaña do seu terceiro álbum como solista, que xa foi obxecto dun primeiro adianto no mes de novembro: o tema Lo estoy soltando, que tamén se pode escoitar en liña.
O vídeo que foi gravado en Rianxo inclúe a participación dos novos músicos que contribuíron á realización do novo traballo discográfico de Nastasia.
