Medio Ambiente regula a nova tempada de pesca da anguía no esteiro do Ulla

Lampreas do Ulla nunha imaxe de RTVE

A Consellería de Medio Ambiente vén de publicar no DOG a normativa que regula a campaña da pesca da anguía na desembocadura do río Ulla, que se celebrará do 1 de febreiro ata o próximo 31 de outubro.

Cabe mencionar que queda aprobada a renovación do plan de aproveitamento específico desta especie para o ano 2021, que autoriza a faenar 15 embarcacións con 35 tripulantes das Confrarías de Ribeira e Rianxo. Doutra banda, manteranse os principais requisitos que rexeron nesta zona durante a campaña anterior. Así, o tamaño mínimo das capturas queda fixado en 20 centímetros. Os pescadores teñen a obriga de devolver ao río aqueles exemplares que non dean a talla. Tamén as anguías prateadas e outros tipos de peixes que poidan entrar nas nasas.

Do mesmo xeito, a única arte permitida para poder practicar a pesca desta especie na desembocadura do Ulla será a nasa-voitirón, cun tamaño de malla non inferior a 14 milímetros e un límite de 80 nasas ao día por embarcación, segundo o recollido no Plan de Xestión da Anguía en Galicia. As nasas deberán ser levantadas e revisadas diariamente e terán que baleirarse o máis rápido posible para evitar a morte das capturas accidentais.

O horario permitido para levar a cabo esta práctica será dende as 12:00 horas do luns e ata as 12.00 horas do sábado, cun máximo de oito horas diarias de traballo.