Hoxe rematou o cribado masivo que o persoal de enfermería do hospital de Barbanza realizou aos traballadores das principais empresas de Barbanza co obxectivo de descubrir posibles contaxiados asintomáticos que puideron provocar brotes coincidindo co regreso ás factorías despois das vacacións de Nadal. Estaban citadas 4.796 persoas, e foron realizar as PCR 4.121, preto dun 86 % do total.
No cribado da industria alimentaria no Barbanza estaban citadas onte 1.102 persoas e acudiron 1.018. Mentres esta mañá citouse a 900 persoas e acudiron ao cribado 720.
Esta é a segunda ocasión que se realiza un cribado a empregados do sector industrial da comarca, debido a que xa levou a cabo outro entre o 11 e 14 de decembro debido ao importante incremento de positivos nos concellos de Arousa norte. Naquela ocasión, puidéronse detectar máis dunha decena de contaxiados asintomáticos.
