En Boiro comezaron as obras para solucionar os afundimentos no Pontillón

O Concello de Boiro está a executar as obras de acondicionamento do terreo na zona do Pontillón, en Escarabote, destinadas a evitar os afundimentos que se viñan xerando na zona. As tarefas poñen o foco en tapar as filtracións de auga que facían que o terreo cedese para crear dunha base firme e volver colocar o monolito tal e como estaba.

O Concello lembra que en Escarabote, no límite entre Boiro e A Pobra, na zona denominada Pontillón, pasa un río que delimita os dous municipios. Co obxectivo de gañar espazo na zona fixérase un recheo ao río e no ano 1995 colocouse alí un monolito. Co paso dos anos e debido ás filtracións de auga o terreo foi cedendo e facía que o recheo se afundise.

Para solucionar eses problemas de afundimento do terreo, o Concello de Boiro está a levar a cabo obras de acondicionamento na zona. O primeiro que se fixo foi desmontar o dito elemento e destapar o espazo para realizar agora unha base firme e evitar as filtracións de auga e que o terreo volva ceder. Unha vez o firme do terreo estea asegurado, vaise volver colocar o monolito no mesmo lugar que estaba.