A Asociación Boirense de Empresarios compartiu este mércores 20 unha boa nova coa veciñanza de concello e da nosa comarca, unha información que pon de manifesto o importante empuxe solidario da nosa xente naquelas situacións, como esta de crise sanitaria que estamos a vivir, nas que máis se precisa esa vontade de botar unha man. Segundo informou ABE, a persoa que resultou premiada co Sueldazo da asociación (a través das súas compras en Joyería Teixeira), decidiu ceder a contía (un rasca gañador do soldo de 300 euros durante seis meses) a causas benéficas.
Dende a ABE déronlle á persoa premiada (que insistiu en que non se desvelase a súa identidade) as felicitacións e os parabéns polo que a asociación considera “unha magnífica iniciativa”.
En canto ao uso do premio será utilizado igualmente nos establecementos asociados participantes na campaña de Nadal pero serán as familias vulnerábeis as que o farán efectivo. “Dende a ABE non imaxinamos un mellor colofón a esta campaña festiva tan atípica e queremos poñer en valor a calidade humana da persoa agraciada que tivo este xesto tan bonito”, engadiu a entidade.
