O Concello de Boiro comunicou hoxe que continúan as obras nas instalacións deportivas da Cachada. En concreto, aquelas relacionadas coa reparación e substitución dos falsos teitos dos corredores, da instalación e do vaso da piscina municipal. O proxecto conta co financiamento da Deputación Provincial da Coruña, cun orzamento total de 84.710,02 euros.
As obras levaranse a cabo no interior e no exterior das instalacións, xa que se desexa eliminar os problemas de filtracións de auga que existían e vaise mellorar a iluminación do establecemento, ademais de embelecer a súa imaxe.
Neste momento estase a realizar a renovación da teitume do vestíbulo e o paso que comunica a piscina, o ximnasio e o polideportivo, co fin de corrixir as filtracións pola corrosión dos elementos metálicos da estrutura. Cando isto remate, procederase á colocación de falsos teitos e láminas de aluminio resistentes á corrosión, tanto no paso de comunicación como no vaso da piscina. Por último, farase a substitución do alumeado existente por un led de baixo consumo cun certificado específico para ambientes cunha humidade alta ou corrosiva.