A mostra Galicia, de Nós a nós (unha ollada á xeración dos artistas e intelectuais que crearon a revista Nós, entre os que se atopaba o rianxeiro Castelao) rematou a súa estadía no Museo Centro Gaiás superando os 15.000 visitantes, aos que se suman os 4.500 estudantes de secundaria que participaron no seu programa de visitas en liña. Os vindeiros pasos da mostra vaina levar a Ourense e Pontevedra.
Organizada pola Xunta e a Deputación de Ourense, a mostra é a segunda gran exposición do Xacobeo 2021 e a gran proposta do Goberno galego para celebrar en 2020 do centenario da revista Nós. Este domingo foi o último día para visitala na Cidade da Cultura.
Con máis de 300 pezas, achegouse como “o proxecto expositivo máis ambicioso realizado ata o de agora sobre a Xeración Nós e o seu legado, exhibindo obras procedentes de Francia, Alemaña e Portugal que poñen o foco nas conexións internacionais da revista e dos seus impulsores”, informou a Xunta.
Galicia, de Nós a nós foi tamén a primeira exposición do Gaiás á que o alumnado galego puido achegarse sen saír do centro de ensino, grazas a un programa pioneiro de visitas didácticas por vídeo-conferencia. O obxectivo desta vertente activa en outubro é levar as exposicións do Museo Gaiás ás aulas e “dar continuidade na Rede ao seu consolidado programa didáctico de visitas”.
Entre outubro e ata este venres 15 de xaneiro, sumaron 4.485 os alumnos ESO e Bacharelato que, tirando proveito da tecnoloxía, puideron afondar na historia e legado da revista e a Xeración Nós grazas a esta exposición e sen desprazarse dos seus centros de ensino, “nun momento no que as actuais medidas de contención da pandemia limitan as saídas escolares programadas”, explicou a Xunta.
Tras a súa estancia no Museo Centro Gaiás, a mostra comezará unha itinerancia no Centro Cultural Marcos Valcárcel, en Ourense, onde se poderá visitar entre o 18 de febreiro e o 18 de abril de 2021. A continuación, entre o 20 de maio e o 11 de xullo de 2021, a mostra fará recalada no Museo de Pontevedra.
