A plataforma Stop Deshaucios Barbanza vén de informar de que dende a oficina da Valedora do Pobo, o Instituto Galego de Vivenda e Solo (IGVS) da Xunta de Galicia e dende a propia entidade anti-desaloxos da nosa comarca, estase a traballar arreo para evitar que unha familia de Ribeira fique na rúa “sen alternativa habitacional”. A orde está prevista para este 17 de decembro, a instancias do Xulgado Número 1 da dita localidade.
A plataforma lembra que hai unhas semanas xa se presentou un escrito ante o propio Xulgado ao obxecto de que “se lle recoñeza a situación de vulnerabilidade á devandita familia”, o que, unido ao importante número de vivendas coas que segundo apunta Stop Deshaucios conta o demandante, propicie a suspensión do lanzamento ou ben que se obrigue á Administración a garantir aos afectados unha alternativa para residir.
Desde a Plataforma Stop Deshaucios Barbanza tamén manifestan publicamente a confianza en que, este vindeiro martes, o Consello de Ministros poida decretar a paralización ou suspensión dos despexes para as familias vulnerábeis e sen alternativa para residir. “Somos conscientes de que non é a solución definitiva, pero axudaría a manter a esperanza para moitas familias que xa teñen sinalado día e hora para o desafiuzamento”, engade a entidade cidadá, que tamén mostrou a súa satisfacción polo incremento do IPREM, o índice utilizado para o acceso ás axudas para as familias máis desfavorecidas de face a poder acceder ao subsidio por desemprego, á asistencia xurídica gratuíta, para as axudas ao aluguer, etc.
