A plataforma Stop Deshaucios Barbanza vén de informar dos traballos de urxencia que se están a realizar para evitar que fique na rúa unha familia de Ribeira que ten sinalado para este xoves 17 de decembro ás 11.00 horas o lanzamento (desafiuzamento) do seu fogar por falta de pagamento de rendas de aluguer.
A plataforma explica que parte deste traballo a contrareloxo estase levando a cabo dende o Concello de Ribeira e dende a alcaldía. Tamén fai saber que se trata dunha familia de tres membros con problemas de saúde, e que a paralización do proceso (ou a procura de opcións habitacionais para residir) serían, tamén, un xeito de protexelos contra a COVID-19, “polo estado de emerxencia que vive neste intre o municipio”.
Amais do traballo do Goberno local e o rexedor Manuel Ruiz, no caso tamén xuntaron forzas a oficina da Valedora do Pobo, o Instituto Galego de Vivenda e Solo (IGVS) da Xunta de Galicia e máis a propia entidade anti-desaloxos da nosa comarca.
A orde está prevista para este 17 de decembro, a instancias do Xulgado Número 1 da dita localidade. A plataforma recorda tamén que xa se presentou un escrito ante o propio Xulgado ao obxecto de que “se lle recoñeza a situación de vulnerabilidade á devandita familia”, o que, unido ao importante número de vivendas coas que segundo apunta Stop Deshaucios conta o demandante, propicie a suspensión do lanzamento ou ben que se obrigue á Administración a garantir aos afectados unha alternativa para residir.
