A Concellería de Cultura do Concello de Boiro deu a coñecer este mércores 30 a programación de actividades para o 5 de xaneiro, planificadas con motivo da tradicional Cabalgata de Reis, un itinerario que este ano virá marcado, de xeito inevitábel, pola necesidade de garantir ao máximo a seguridade sanitaria da poboación. Isto afectará ao propio percorrido, que non será o mesmo que o doutros anos, e que obrigará á cidadanía a adaptarse a unha proposta remodelada. O Concello quixo manter esta actividade, malia a situación de pandemia, “porque é unha oportunidade para que as nenas e nenos do municipio poidan gozar dun día máxico con todas as medidas de seguridade”.
A Cabalgata, materializada nun Bus Real, levarase a cabo en todas as parroquias do municipio. A idea é que ningunha crianza fique sen visitar aos Reis e entregar a súa carta. “A situación sanitaria non nos permite que a Cabalgata se celebre como é habitual, pero non queremos deixar aos nenos sen a ilusión deste día máxico e especial para eles”, afirmou a concelleira de Cultura, María Outeiral.
Co devandito obxectivo, deseñouse unha ruta que Melchor, Gaspar e Baltasar, acompañados dos paxes reais, farán para percorrer todas as parroquias “seguindo todas as medidas de hixiene e seguridade”. Asi, durante a visita das súas maxestades será obrigatorio o uso de máscara, a desinfección de mans e o mantemento da distancia de seguridade.
O autobús real iniciará o seu percorrido pola mañá e a primeira parada será en Cures, ás 12.00 horas, na praza da Igrexa. Ás 13.00 horas estarán en Macenda, xunto a Igrexa, a carón do campo de golf, e ás 14.00 horas estarán na Igrexa de Bealo. O percorrido continúa pola tarde por Cespón, onde pasarán ás 16.00 horas pola praza de San Roque, en Abanqueiro estarán ás 17.00 horas xunto o Centro Social e chegarán a Cabo de Cruz ás 18.00 horas, xunto a Lonxa. Ás 19.00 horas estarán en Boiro, na praza do Concello e o percorrido rematará en Escarabote ás 20.00 horas, xunto a Igrexa, antes da misa que se celebrará na Igrexa de Lampón ás 21.00 horas coa presenza dos Reis Magos e con capacidade limitada.
O Concello de Boiro conta coa colaboración da veciñanza de Lampón e tamén con Autos R. Outeiral. A actividade está pensada para nenos e nenas, para que “poidan ver desfrutar deste día”, polo que o Goberno local fixo un chamamento para “que se eviten as aglomeracións e que se sigan todas as medidas de seguridade pautadas polas autoridades sanitarias para previr que se produzan contaxios”.
