Quen queira inscribirse para participar na nova edición da tradicional carreira Sin-Son 10K, que este ano vén con formato virtual co obxectivo de garantir a saúde das e dos participantes, aínda ten até o 18 de decembro para facelo. A carreira impulsada como cada ano por estas datas polo Concello de Porto do Son a través da súa área de Deportes tivo que adaptarse á nova realidade da COVID-19, e fíxoo transformándose nunha experiencia online e afondando na súa vertente (tan necesaria nestes tempos) solidaria (o recadado irá dar a asociacións e entidades locais de apoio social). De feito, o lema que acompaña a iniciativa este ano fala por si só desta vontade de botar unha man a quen o precisa a través do deporte: Sumamos quilómetros, compartimos solidariedade.
Como lembraremos, a cota é de 5 euros e a inscrición pode facerse na web Emesports e a aplicación Rockthesport, que se pode descargar de balde nos móbiles de cada quen. Compartiranse nas redes sociais as fotos das e dos participantes, que se implicarán na proba deportiva a través da devandita ferramenta móbil e mediante cinco modalidades diferentes: a carreira virtual de 10 quilómetros, a carreira virtual de 5 quilómetros, a carreira virtual 3K e a carreira virtual 1k, ao que suma a opción de dorsal 0, que permite facer doazóns sen participar na proba.
A carreira en si mesma realizarase entre os 19 e 20 de decembro de 2020. O procedemento é similar ao dunha carreira convencional, pero, desta volta, o dorsal é descargado polo propio participante a través da devandita plataforma. A carreira celebrarase entre as 8:00 do sábado día 19 de decembro e as 23:00 do domingo día 20 de decembro. Durante este prazo cada deportista deberá afrontar a distancia na que se inscribiu sendo o control a través da dita ferramenta móbil, que deberá instalarse no teléfono ou dispositivo móbil. Unha vez finalizado o percorrido o sistema recollerá o seu tempo que ademais poderá compartir en redes sociais. Tamén poderemos facernos fotos co dorsal e subilo ás redes sociais.
