A pasada semana finalizou o curso de redeiras impulsado polo GALP (Grupo de Acción Local Pesqueira) e o Concello de Porto do Son ao longo desta recta final do outono e comezos do inverno. Foron 300 horas de formación, tras as cales as e os participantes obtiveron un certificado que lles facilitará a incorporación ao mercado laboral.
Os contidos do curso trataron (entre outros) temas como a clasificación e a confección de artes e aparellos de pesca, a interpretación dos apeiros, o emprego de materiais para os utensilios, a elaboración de palangres ou a prevención de riscos relacionados co armado e montaxe de artes e aparellos. O obxectivo, a mais de xerar emprego e capacitar ás e aos participantes para un novo posto de traballo, foi visualizar este apartado concreto do sector pesqueiro, que, segundo informou o GALP da Ría de Muros e Noia, “polas súas peculiares características sempre foi un dos grandes esquecidos”.
Como resultado final, neste curso obtiveron o noso certificado un total de 17 mulleres e 2 homes, que agora poderán ter acceso á proba para alcanzar o certificado de profesionalidade de Confección e Mantemento de Artes e Aparellos e poder exercer así a súa profesión de modo independente.
