O Concello de Boiro realizou este 3 de decembro unha xuntanza cunha ducia de hostaleiros da localidade na Casa da Cultura, co obxectivo de solucionar as dúbidas respecto á entrada en vigor da nova ordenanza de terrazas na vía pública e escoitar suxestións. A proposta levarase ó pleno para a eliminación das taxas do próximo ano, 2021.
Na reunión estiveron o alcalde de Boiro, José Ramón Romero, o Concelleiro de Comercio, Marcos Fajardo, a tesoureira municipal, Marta Oviedo, e representantes da Policía Local.
Un dos cambios máis importantes da nova normativa é a modificación do prazo de solicitude das terrazas, xa que varía en función do momento do ano en que se coloque a terraza. Anteriormente a petición de terrazas para todo o ano podía facerse antes do día 15 de decembro. Nesa mesma solicitude, os hostaleiros indicaban o número de mesas que colocarían durante o ano, nas celebracións festivas como Semana Santa ou no verán. Sen embargo, coa nova ordenanza, os prazos están abertos do 1 de marzo ao 15 de abril e 10 días antes da data no caso de Semana Santa.
Outra das medidas que se modificaron foi a relativa ao horario de apertura das terrazas. Sempre que sexa véspera dunha época festiva ou estival, é dicir dende o 1 de maio ao 30 de setembro, estas poderán abrir ata un máximo das 00:00 horas de luns a xoves e ata as 02:00 horas nas noites dos venres, sábados e domingos.
