O Estado apela á calma e di que o barco non notificou ao Organismo Internacional de Enerxía Atómica “ningún tipo de incidente nuclear”
Tal como vimos informando en “O Barbanza” o buque de propulsión nuclear ruso ‘ Sevmorput’ navegará a partir desta medianoite a unhas 50 millas das costas galegas cara a San Petesburgo, cun seguimento permanente por parte da Mariña Mercante.
Segundo asegura o Ministerio de Transportes, Movilidad e Axenda Urbana nun comunicado, reforzarase o control do barco a través do Centro de Coordinación Nacional de Salvamento Marítimo coa colaboración do Consello de Seguridade Nuclear.
Este organismo xa informou á Mariña Mercante que o buque “non notificou ao Organismo Internacional de Enerxía Atómica ningún tipo de incidente nuclear” durante a súa travesía, algo que sería “de obrigado cumprimento” se se detectase calquera tipo de anomalía que supuxese a liberación de material radioactivo.
O Ministerio tamén indica na nota de prensa que os sistemas de vixilancia radiolóxica ambiental españois non detectaron “ningún valor de medida anómalo” nos días que navegou pola zona marítima das Illas Canarias.
Mariña Mercante fai un chamamento á “tranquilidade” e expresa o seu “desexo” de que o buque atraque en San Petesburgo na data prevista: 31 de decembro. A Dirección Xeral lembra que de producirse algunha incidencia Salvamento Marítimo está preparado para dar unha resposta “inmediata”.
Pola súa banda a asociación ecoloxista “Arco da vella” remitiu un comunicado no que advertía que o paso do ‘ Sevmorput’ fronte a Galicia cunha “propulsión limitada” faría que a súa travesía resultase “particularmente perigosa no medio dun mar encrespado”.
De acordo con cifras deste colectivo, o buque ruso navega cara ás costas galegas a unha velocidade de 10,5 nós, polo que se espera que chegue á vertical de Vigo pasada a medianoite.
Neste contexto, Arco da vella instou a Salvamento Marítimo a manter en estado de alerta a embarcación ‘Don Inda’, xa que, en caso “de emerxencia de rescate”, o gran tamaño do ‘ Sevmorput’ “faríao ingobernable”.
