Axentes da Policía Autonómica levaron a cabo do 23 ao 27 de decembro un total de 128 inspeccións en 22 concellos galegos, incluídas no marco de actuacións anti-COVID. Os operativos saldáronse con 35 denuncias. Ao abeiro destes controis, realizaron na provincia da Coruña 38 dispositivos nos concellos de Ames, Boiro, A Coruña. Ferrol, Narón, Ribeira, Rianxo, Santiago de Compostela e Teo, que tiveron como resultado 15 denuncias, 13 en Santiago e 2 en Narón.
Durante os operativos, os axentes controlaron que nos establecementos abertos ao público se cumprisen as medidas aprobadas polas autoridades sanitarias para facer fronte á COVID-19, como o uso obrigatorio de máscara, o cumprimento da distancia de seguridade, así como o aforo e o horario de peche dos locais e a prevención do botellón.
